ديوان عبدالله الكايد.. - الصفحة 2

نورما · 18/11/2010, 02:19 AM

يتوهـ الضو في ليلٍ من الظلما فـ بعضه تاه !
مثل ماتوه وآفتّش
....................فـ عين الحرف عن مهرب
على قد الغموض اللي تمادى بي فـ عينه: آآهـ
على هالآهـ ؟!
..........تتمادى عليّ عيونهم وأتعب
عيون الناس و ( الما ) في عيون الناس من يظماه ؟!
على حد الهلاك تغنّي ازهاري ( ظماه أعذب ) !
يـ عين امّي
..........نسيت اذكر وصاة ( أن العيون افواه )
مثل ما ناكل ونشرب
....................تعبنا تاكل وتشرب
أنا أذكر كل ما قلتي ( عشان أرضى عليك أنساه )
أكيد أنساه ؟!
....................وآغمّض عشان رضاك لا يغضب
إلى يومك وأنا هادي مغمّض ما فتحت شفاه
على نفسي ومن نفسي عليها أنطفي وأشتب!
أنا لله أحب الناس و أكرههم كذا لله
حسافة
....................ليتني لله منهم أنكره و أنحب
كسوني ثوب جردني من أحلام الطفولة : ياه
كبرت !
................وذاك في صدري إلى البارح وهو يلعب
خذوني طفل ما كدّت " اماني " شعرها لولاه
رموني صبّ متهالك مشرّد شاعر و أعزب !
يـ يمه قولي ان قالوا نبي قربه عشان الله
عشان الله
................خلوني تراني من بعيد أقرب
أنا بي جرح مدري مين ابوه ؟
و ليه ما سمّاه ؟
أنا لي وجه خلاّه الجفاف السرمديّ أشهب!
عليه اعتب إذا شفت الوجيه من الوجيه اشباه
أعرفه يستحي مثلي
ومن ( مثله) عليه أعتب ؟!
عشان أرتاح قلت أشطب فـ صدري بالكتابة ( آهـ )
................................كأني ما شطبت و ما كتبت إلاّ عشان أتعب !

نورما · 18/11/2010, 02:20 AM

تحت تأثير ( الكحل )
...............يلعن , نعاسه
كان رمش و كنت انا و ابليس وسـ وسـ
فوق راسي كلّها من تحت راسه
...............يفتح الخنّاس عين الناس للـ ( مَس )
في عيون الناس . ناس اكثر شراسة
...............توّها تصحى و توّ الليل عسعس
آهـ من يقرأ " تبارك " وسط كاسة
تستوي لي "حرز" و اشرب وآآتنفّس
مو عشان يبلّ شرياني يباسه
لا ..
...............عشان الجرح و ( الكاس المقدس )

تبي تشوف الضياع بصورته ..؟ شفني
...............شف يا(عيوني)..
عيوني ..تعرف اوضاعي
من دون داعي ، تعانق دمعتي جفني
وشلون لا صار يوم وداعك الداعي؟!
( الجرح ) يعطش..؟
.........وانا الاوجاع تنزفني؟!
ما يعطش الجرح دام الساقي اوجاعي
تزرعني الريح بـ انفاسك ..
...............وتقطفني
وآروح معها ، مثل ما روّح شراعي !
هذي (ذراعي) إذا ..حبيت، تخطفني
تحضن ذراعي .. أو انك تلوي ذراعي!
ما دامني معك ،
...............خل الظلم ينصفني!
كل ما تجيبه سماك.. تعيش به قاعي
خذني لحن من ( زمان الصمت) واعزفني!
وآصير انا الناي ..لا.. والذيب والراعي
...............ميل وتمايل قبل ما الدمع يذرفني
وان ضاقت الارض ، تحتك ...
...............هذي اضلاعي
العب طرب فوق هذي العوج ..
....................................وارجفني
اطرب عيوني ،قبل لا تطرب اسماعي
وان شفتني آتساقط ..
.............................لا توقفني
واعيك ...(غافي حزن) يالغافي الواعي!
اجهلك.. واعرف ..
كثر ما اجهلك ..تعرفني
الحزن طبعي ..واشوفه أجمل اطباعي
الجرح يظما ؟
وانا الاوجاع تنزفني؟!
وشلون يظما وانا (الما) يشرب اوجاعي

نورما · 18/11/2010, 02:21 AM

ان كتمت الجرح.. من طيبي.. ولـ عيون الأخوّة
وان ;كتبته.. ما كتبته غير.. لعيون الكتابة
الكتابة؟..جرح..
...................يا جرحي. وضعفٍ فيه قوّة
والكآبة..؟
..............غيب فيني.. تعرف حدود الكآبة
والمشاعر لو ابخفيها،
........................غصب عنّي، تفوّه
والقصيد يدق بابي...
...............لو... ما دقيت بابه
غارقٍ (حضرة جنابي).. في هوى (حضرة سموّه)!
وفي هوى (حضرة سموّي).. غارقٍ (حضرة جنابه)
والاجابة ..،
يالسؤال اللي تسميها .مروّة
أي مروّة.. وانت حاديني على..،( مرّ الإجابة)
هو أنا اللي ..من عذابه يرفق بحاله عدوّه؟!
والا انا اللي.. دون فرحه وقّفوا كل القرابة!؟
هو انا ذاك (الصغير)..
........اللي بدنيا الحب توّه؟
والا انا من(ضاع عمره) بالهوى وافنى شبابه؟
هو انا اللي ..عن (سيوف البرد) قام وشب ضوّه
ما درى إلا وناره احرقت زاهي ثيابه
والا أنا ذاك اليتيم الجاهل ابمعنى الابوّة..؟
إنجرح صوته. وهو يسأل..
.........................ولا حيٍ درابه
من عذابه.. يسأل امه. كيف غاب؟ و وين هوّه؟
يسأل امه من عذابه، هو متى ينهي غيابه؟!
كل فرح ،
..........وكل جرح/ن/
..........في طرف عيني.. تشوّه
ضحكتي فيها. (غموض) ودمعتي فيها (غرابه) !
سو فيني يا زماني كل ما تبغيه سوّه
والا انا (ماعاد تفرق)..
..........دامها الاشيا تشابه
والسؤال اللي من اسبابه لقى(المجروح جوّه) !
انتثر همّه حروف وعاد (لجنون الكتابة)
وارجع آقول
.................الكتابة.. جرح( ضعف) وجرح (قوّة)
والكآبة غيب فيني (تعبر) حدود الكآبة

نورما · 18/11/2010, 02:22 AM

غَافَل النسناس ، شعلة في بدايات النهاية
توّها تنعس
.........واخذها من فم الجمر وعطاني:
الظلام وهمهة جرح يتوقّد في حشايه
.....لاخطفني من يدين الليل في فمّه رماني
ان سكت..
تاهت بي الخطوة عن دروب الهداية
وان حكى من خاطره ..
................................أيوووه للظلما حكاني..!
عسعس الليل
وتنفّس حِلم مجهول الحكاية
................مو عشاني كل ما عسعس عليه الليل جاني،!
له وطن ..
ما يحرمه في داخل المحروم ..
رايه له من احساسي بساتين ، ومن افكاري مباني !
الوحيد اللي يقف ضدّي
..............................واحس انّه معايه
فيه اماني
............واكثر ايماني يخاف،
....................................افقد اماني
له من الليل الهدوء وصوت (متعبّد) بـ آية
ولي من الحلم اليتيم ، الحلم و اليتم وزماني
بـ ابتسامة ..!
................يخنق انفاسي على صدر الوصاية
(للمرايا حق واحلام ومشاريه وأماني)
قلت والناس؟ ..
ورضاهم؟
عن سخطهم فيه غاية قال من فيهم .. يوقفّني ..
................................................ول ا يجلس مكاني؟!
يكفي انّك شفت منهم ما عمى عين المراية
................................كان ودّك تبقى (الاول) لا تكون (الاولاني)!
ما على بالك يموت بـ صمت في نصف الرواية
................زلة لسان و تكون انسان .. بس انسان ثاني، !
لا تقول الناس.. لو (فيهم)!
خطاك انت وخطايه عشتهم
................عمرك و ابيك تعيش لو (ليلة) عشاني
ودي انزع من جناحي (ريش ليل آخِر غواية)
................وآخذ من الصبح.. (ريش آخَر ) بدال اللي كساني
وآتنهّد من حطام اسلافي الرحّل ..
................حداية تقطف احساس الثريّا ورد ، لـ سهيل اليماني
وآتهيّا للبحر مقهور واضربه بعصايه
................(ضربة الخايف) ولو قلبي من القسوة يعاني!
ينفلق (قافين) بـ اذن اللي جبر خاطر ،
................رضاية وآتشظى في (شفاه) اطفال خلق الله آغاني
وان تعبت وشفت في وجهي من الغيمة ،
................................................ضم ايه
بـ اجمع احساسي واغنّي لك "سقا الله من سقاني"
لانّك اطهر وجه اشوفه (غاب) في وجه المراية
................واعظم اعظم من يوقفني..،
................................................ول ا يجلس مكاني

نورما · 18/11/2010, 02:23 AM

البرد والخوف والتشريد والساري
والعزف عــ النـزف والآهات والظلما
وأنفاس (سلمى) وانا .. لا .. صدري العاري
...........كلما تنفّست ضيق .. تنفّست (سلمى)
(خمّارة الحرف) ,
ويني ..؟
.....وينها دياري.؟
...........تعبت ارتب وجيه الناس عــ الاسما..!

الأرض .. كف التعيس ،، وخطوتي .(قاري)
مع كل خطوة ,
...........أضيع
...........وانجرح ..
.............و ادما
خطاوي اعمى .. بــ ليل اظلم من اقداري
جيتك ... وكوني إذا ..جيتك..(عصاة اعمى)
اشعلك ظلما ،،
...........تكسّر خاطر انواري
والقاك.... ظلما ..!
...........توديني عيون الما
واشربك واضح ...
...........وازيد اشربك متواري
خلف الظما . بس ..
...................... مهما أشربك أظما
(مهما) تكونين , اكونك غربة افكاري
تعبت منْك ,,
ومن افكاري
ومن
(مهما)!

عبث أصابعك بـــ شفاهي وبــ زراري
يا ضيقة الصدر لو ما فكّته ,لو....(ما)
اتنفّسك ذنب ..
...........واستغفر ..! وانا داري
اذا تنفّستك أغرق ,, بس اكون (اسمى)
عشان اعلّم ذنوبي.. قيمة اعذاري
...........وآعلّم (الضي) وش هي قيمة (الظلما)!

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

مركز تحميل الصور	مجاني	دليل مواقع	أجمل أسماء الاطفال	استشارات طبية مجانية
مدونة رسين	توبيكات ماسات	فوتوشوب Online Photoshop	أذكار	بيج رانك Google PageRank

الذين يشاهدون محتوى الموضوع الآن : 1 ( الأعضاء 0 والزوار 1)

إهداءات ماسات