بديت بسم الله عالم مكني=واعوذ به من الوجيه البغيضه
من بعدها ياهاجسٍ ممتحني=من يوم ماحولت يم الحريضه
قمت آتذكر من بسيفه طعني=طعنة قفا .. ماهو بطعن النقيضه
نشدت نفسي حيل : وش جاه مني ؟=وكان السبب حسد القلوب المريضه
انا اشهد ان مفارقه ماشحني=هو المشتحن .. من هو بمثلي يعيضه ؟؟؟؟
وفيت له وأخلصت له بس كني : = اصلي السنه .. واخلي الفريضه
كنت انقهر لاجا لهزله يدنّي=وش دخل معوض بزلات عيضه؟؟
خله معا اللي ناسبوه امتهني=(( يالقينقاع أفرح بربعك قريضه ))
ماجي مجالسهم وأأكد وأثني=إلا اذا جابو من الديك بيضه ؟
انا مع اهل الطيب اناسب لأني=طليق يمنى من قبيله عريضه
وعزالله الوالي .. على صغر سني ؟؟=نجمي بعين الكفو يعكس وميضه
أحمي مواقيفي ولا خاب ظني=أحمي كما يحمي السهول الرويضه
شاعر ولي طرقي وذوقي وفني=ولبيه ياشعري ببرده وقيضه
خذ الخبر ياصاح مني وعني=تدري وش اكثر شي قلبي.. يغيضه ؟
أنه يغني الواحدٍ مايغني=وانه يعاشر له قلوبٍ مريضه

المصدر: منتديات ماسات - من قسم: قصائد الاعضاء - حصريا لاعضاء الموقع (يمنع المنقول)