(( مصافحة أولـى )) أعجبتني فـ نقلتها لكـم .. وعسى أن
تحــوز على بعض إعجــابـكــم ....
تذكرتك وأنا الطير الجريح مفارق الخلان ...
ونار البعد وفراقك تعـلّ اقصى شراييني ..!!
أنا أدري بك سرابٍ ماتطفي لهفة الضميان ...
تذكرتك عذاب .. ولو نسيتك منت ناسيني ..!!
أبعـرف في غيابك ليه شوفي يمتلي دخان .؟؟
وأحس إني لحالي وأقرب أصحابي حواليني ..!!
حبيبي رحت عني وانت لا راضي ولا زعلان ...
ياليتك قلت لي قبل الفراق إنك مخليـني ..!!
رحلت وغابت الفرحه ورى ليلٍ من الحرمان ...
ورجعت لصوتك اللي كان يملا الكون يدعيني ..!!
أثر نار الجفا صلفه .. دخيلك ياعظيم الشان ...
أنا ماعاد لي شوفٍ على الفرقا يقدّيني ..!!
بعد فرقاك عشت الجرح عمر العاشق الشفقان ...
على باب
العمر لامرّ لك طـاري يبكيني ..!!
تعرف إنك بقلبي وأدري أنت لشوفتي ولهان ...
حبيبي ليه تقتل حبنا مـا دمت تغليني ..!!
تخفـّي لوعتك عني تصدّ وتبدي النسيان ...
وتفضح نظرتك خافي حنينك لو تراعيني ..!!
حبيبي تعبت عيوني السهر من عاشق سهران ...
تعبت وطال بعدك .. والعمـر مـا عاد يمديني ..!!
غرب ضيّ
الأمل قبل
الشروق وسادت الأحزان ...
دروب
العمر تسرق فرحتي ..
والحزن يطويني ..!!
أنا مثل الغريق وطاري الذكرى كما الطوفان ...
تزيد الجرح في قلبي .. وتبعدني .. وتدنيني ..!!
تعبت ومركبي ملّ السفر وضاقت به الشطآن ...
ولا لــي غير حبك ساحلٍ يمكن يرسيّني ..!!
حصدت الدمع محصول الفراق ولوعة الهجران ...
إليــا مني ذكرتك غـَرق كفوفي مطر عيني ..!!
سحابك يامشاش الملح مايفرح به العطشان ...
أموت من الظما وإليـا شربتك منت مجديني ..!!
ينابيعك تفجر من عيــوني كنها بركــــــان ...
توطـّي عـزتـي تـخـتـال من جفني لـ كفيني ..!!
بعد ما ضاع عمري بالحزن ضاقت بي البلدان ...
وشفت الموت في كل الدروب وقلت أنا ويني ..!!
أنا مــليت ... مــليت العذاب ... وقلبي المليان ...
بــ همٍ صاب من هجر الحبايب مقتل سنيني ..!!
يأست من الفرح في موسمٍ فيه
الأمل كسلان ...
رفعت الرايه البيضاء لـ حزني وإرتمى فيني ..!!
وعرفت إني بعد فوت الأوان العاشق الخسران ...
ودريت إن أصدق وعود الهوى ما عاد ترويني ..!!
ورجعت بحسرتي .... كلي جروح مكسّر الجنحان ...
وسال الجرح دم ... وشفت وجهك في شراييني ..!!