خصمك يالأزرق يشتكي من سواياك
حاول تسوّي فيه خير ومروّه !!
أرحم رحمك الله وحنّا طلبناك
قل للي يلعب لعبة الموت توّه !!
توّه على بعض السوالف فديناك
أرفق عليه / أعطه على حسْب جوّه !!
هذا هلال المجد والعز شرواك
الأزرق اللي ما طفا يوم ضوّه !!
دايم مكانه بالسما شوفه هناك
حنّا بعد ناخذ علو من علوّه !!
نجمٍ سطع بين الكواكب والأفلاك
حتى الذهب ما يعشق إلا سموّه !!
خسران منهو يالهلالي تحداك
مثل البحر يشبه جنونه هدوّه !!
مفروش دربه ورد لو أنّه أشواك
كل من تفوّه سكّته لاتفوّه !!
يكفينا والله ننتشي لاطريناك
هيبه وعزّه يالهلالي وقوّه !!
كاسٍ رفعته لمعته وسط يمناك
تستاهله واللي تبي اليوم سوّه !!
وخصمك إلى منّه شكى من سواياك
حاول عليه أحيان أنّك تموّه !!